ஏன் மத்திய அரசு தமிழர்களின் குரலுக்கு செவி சாய்க்கவில்லை

என்றுமில்லாதவாறு இன்று ஈழ தமிழர்களுக்கு ஆதரவான குரல் தமிழகத்திலே ஏற்பட்டிருக்கிறது . இது அரசியலுக்கு அப்பாற்பட்டு ஏற்பட்ட ஒரு குரல் . ஈழ தமிழர்களுக்கு ஆதரவான குரலானது இளைஞர்கள் , மாணவர்கள் , பெண்கள் என ஒவ்வெரு மட்டத்திலும் ஏற்பட்டிருக்கிறது .

இப்படி ஒட்டு மொத்த தமிழகமும் ஈழ தமிழர்களுக்கு ஆதரவாக இருந்த போதும் ஏன் மத்திய அரசு அசைந்து கொடுக்கவில்லை . மத்திய அரசு தமிழர்களின் மீது வெறுப்பாக இருக்கிறதா ? இந்திய அரசு நலனுக்கு இலங்கை பிரிய கூடாது என்று மௌனம் காக்கிறதா ? விடுதலை புலிகளின் மீதான வெறுப்பின் மீது ஒட்டு மொத்த தமிழர்களின் குரலுக்கு செவி சாய்க்கவில்லையா ?

இப்படி பல கேள்விகள் இன்று எல்லோர் மனதிலும் எழும்பி கொண்டிருக்கிறது . இதை பற்றி சிறிது அலசி பார்போம் .

முதலில் இன்றைய அரசியல் சூழலை பார்க்க வேண்டும் . பல்வேறு சிக்கல்கள் மத்தியிலும் ஐந்து ஆண்டுகள் ஆட்சியை ஒட்டிவிட்டது காங்கிரஸ் கூட்டணி . இன்னும் மூன்று மாதத்தில் நாடாளுமன்றத்திற்கு தேர்தல் வரவிருக்கிறது . இந்த நேரத்தில் அனைத்து அரசியல் கட்சிகளும் தேர்தலுக்கு கூட்டணி பற்றி காய் நகர்த்த ஆரம்பித்து விட்டது .

இந்த சூழ்நிலையில் தான் சிங்கள அரசு மிக கொடுரமான மனித அவலத்தை தமிழர்கள் மத்தியில் தினம் தினம் அரங்கேற்றி வருகிறது . இதை கண்டித்தும் போர்நிறுத்தத்தை வலியுறுத்தியும் அரசியல் கட்சிகள் சார்பாகவும் , அரசியல் காட்சிகளுக்கு அப்பாற்பட்டும் போராட்டங்களை நடத்தி வருகின்றன . இதில் முக்கியமாக காங்கிரஸ் கட்சியும் , அதிமுகவும் நேரடியாக விடுதலை புலிகளை எதிர்கின்றன . இந்தநிலையில் இந்த இரண்டு கட்சிகளின் தலைமைகளும் சிங்கள அரசுக்கு ஆதரவாகவே கருத்துக்களை சொல்லி வருகின்றன .

திமுக சிங்கள அரசுக்கு எதிராக கருத்தகளை சொன்னாலும் போர் நிறுத்தத்திற்கு அவசர நடவடிக்கை ஏதும் எடுக்கவுமில்லை . அப்படி மத்திய அரசை வலியுறுத்தினாலும் மத்திய அரசு அதை பற்றி கண்டு கொள்ளவுமில்லை . இது தான் மத்திய அரசின் அலட்சியத்தை படம் பிடித்து காட்டுகிறது .

இன்று தமிழகத்தில் அதிமுக தொண்டர்களாக இருந்தாலும் சரி , திமுக தொண்டர்களாக இருந்தாலும் சரி , காங்கிரஸ் தொண்டர்களாக இருந்தாலும் சரி யாருமே விடுதலை புலிகள் தோற்பதை விரும்பவில்லை . ஏனெனில் விடுதலை புலிகள் மட்டும் தான் ஈழ தமிழர்களின் ஒரே பிரதி நிதிகள் . விடுதலை புலிகள் தோல்வி பெற்றால் தமிழன் தோற்பதை போல் ஒவ்வெரு தமிழனும் நினைக்கிறான் . ஆனால் கட்சி என்ற நிலையில் தன் தலைமைக்கு விசுவாசமாகவும் இருக்கிறார்கள் .

ஏன் இந்த பிரச்சனை என்று நாம் பார்க்கும் போது அது மக்களிடம் உள்ள பிரச்சனையா ? இல்லை அரசியல் கட்சிகளிடம் உள்ள பிரச்சனையா ? இன்றைய சூழ்நிலையில் உலகமே சுயனலமானதாக மாறி விட்டது . நான் என் வேலை என்ற நிலை ஏற்பட்டு விட்டது . யார் எப்படி போனாலும் நானும் என் குடும்பமும் நல்லா இருந்தா போதும் என்ற சுயநல சிந்தனை ஒருபுறம் . ஈழ தமிழன் அழிகிறான் என்ற கவலை மனதில் இருந்தாலும் . நான் என்ற நிலையில் அது மிகவிரைவில் மறந்து போய்விடும் .

அரசியல் கட்சிகளோ எப்படியாவது தேர்தலில் வெற்றிபெற வேண்டும் அதற்காக யாருடன் வேண்டுமானாலும் கூட்டணி வைத்து விடலாம் . அப்படி கூட்டணி வைத்து விட்டால் இது தேர்தல் உடன்பாடு மட்டும் தான் என்றும் சொல்லி விடலாம் . இப்படி தொகுதி ஒப்பந்தம் செய்து தேர்தலில் நின்று வெற்றிபெற்றாலும் இவர்கள் சொல்வதை கேட்க வேண்டும் என்ற கட்டாயம் அரசுக்கு இல்லை . மக்கள் மனநிலையை புரிந்து கொள்ள வேண்டிய கட்டாயம் கட்சிகளுக்கும் இல்லை .

காங்கிரஸ் கட்சியை எடுத்து கொண்டால் திமுக இல்லையென்றால் அதிமுக கூட்டணி வைக்கும் . இதனால் காங்கிரஸ் கட்சிக்கு எந்த இழப்பும் இல்லை . திமுகவுடனும் அதிமுகவுடனும் கூட்டணி வைக்க சிறிய கட்சிகள் தயாராக இருக்கிறது . இதுவரை எந்த தேர்தலிலும் ஈழ தமிழர் நலனை முன்வைத்து எந்த கட்சியும் போட்டியிடவுமில்லை .

இந்த தேர்தல் கூட்டணியும் அப்படிதான் அமைய போகிறது ஈழ தமிழர்களுக்கு எதிரான கூட்டணி என்று எந்த கூட்டணியையும் எந்த கட்சியும் குறை சொல்ல முடியாது . ஏனெனில் இரண்டு கூட்டணி தலைமைகளுமே ஈழ தமிழர்களுக்கு எதிரான கூட்டணிதான் . அப்படி தேர்தலில் முன்வைத்து மக்கள் அங்கீகாரம் பெறாத ஒரு கோரிக்கையை வரும் அரசுகள் எப்படி நிறைவேற்றும் .

என்று தமிழகத்தில் ஈழ ஆதரவு கட்சிகள் ஓன்று சேர்ந்து தமிழ் ஈழ விடுதலையை முன்வைத்து தேர்தலில் வெற்றிபெறுகிறார்களோ அன்று தான் தமிழ் ஈழ பிரச்சனையில் இந்தியா ஈழ தமிழர்களுக்கு ஆதரவாக இருக்கும் . அதுவரை சிங்கள அரசுக்கு ஆதரவாக இருந்து கொண்டே இருக்கும் . அதுவரை மக்களும் ஏமாளிகளாகவே இருப்பார்கள் .

ஈழ ஆதரவு கட்சிகளே நீங்கள் வெறும் போராட்டங்கள் நடத்தி பயன் இல்லை. ஈழத்திற்கு எதிராக இருக்கும் கட்சிகளை இப்போதே ஒதுக்கி விட்டு நீங்கள் புதிய கூட்டணி அமைத்து போட்டியிடுங்கள் . அதன் பின்னர் மக்களிடம் வாக்கு கேளுங்கள் தமிழின விரோத ஆட்சியா ? இல்லை தமிழின ஆட்சியா ?

தவறு ஒன்றும் மத்திய அரசிடமில்லை தமிழகத்தின் மீதே . தமிழா விரைந்து செயல்பாடு. உனக்கு எதிராக செயல் பட்டு விட்டு தமிழகத்திற்கு வாக்கு கேட்க வர பயம் இருக்க வேண்டும் . இந்த தேர்தல் தமிழ் ஈழத்தை வென்றெடுக்கும் தேர்தலாக இருக்கட்டும் . ஈழ ஆதரவு கட்சிகளே இது தான் தமிழ் ஈழ மக்களுக்கு நாம் முதல் கடமை . வெறுமனே நீங்கள் எடுக்கும் போராட்டம் பயன் தராது . Tweet